Fréttir Keppnir

Rangárþing ultra: 50 km utan þjóðvega

Í kvöld verður fjallahjólakeppnin Rangárþing ultra haldin í annað skiptið, en hjólað er á milli Hvolsvallar og Hellu. Mótið er samstarfsverkefni sveitarfélaganna Rangárþings ytra og Rangárþings eystra. Er ein vegalengd í boði sem er 50 kílómetrar og verður ekkert hjólað á þjóðvegum.

Eiríkur Vilhelm Sigurðarson markaðs- og kynningarfulltrúi keppninnar, segir að um 100 manns séu skráðir og skráning sé opin fram til 18:15, en keppni hefst klukkan 19 í kvöld. Seg­ist hann gera ráð fyr­ir nokkuð yfir 100 þátt­tak­end­um í það heila og ger­ir ráð fyr­ir góðri keppni. „Veður­spá­in góð og al­gjör­lega til­bú­in í þetta,“ seg­ir Ei­rík­ur, en þegar Hjólafréttir náðu í hann voru móts­hald­ar­ar að ljúka und­ir­bún­ings­fundi.

Í fyrra, þegar fyrsta keppnin fór fram, var hjólað frá Hellu á Hvolsvöll, en nú er því snúið við og farið frá Hvolsvelli á Hellu og mun upphafsstaðurinn skiptast á milli sveitarfélaganna milli ára.

Helsta breyting fyrir keppendur er að sögn Eiríks að í ár er næstum öll hækkunin í byrjun keppninnar. Þannig eigi meirihlutinn af hækkuninni að vera kominn á fyrstu 10 kílómetrunum og eftir það byrji að lækka.

Eiríkur segir að keppnin sé ekki talin tæknilega erfið, en að keppendur fái að hjóla á sandi, möl og eiginlega flest öllu mögulegu undirlagi sem í boði er á Íslandi. Þá verða um 14 kílómetrar á malbiki, en Eiríkur tekur fram að allt sé það utan þjóðvega.

Gera má ráð fyrir fyrstu keppendum í mark um 20:20 og verðlaunaafhendingu klukkan 21.

Fyrir áhorfendur bendir Eiríkur á að þægilegt geti verið að koma sér fyrir við Keldur, auk upphafsstaðar og endamarks. Þannig sé aðgengi að Keldum gott og hægt að leggja bíl þar.

Í lok keppni er öllum keppendum boðið í súpu, grill og sund.

0 comments on “Rangárþing ultra: 50 km utan þjóðvega

Skildu eftir svar

%d bloggers like this: